مصر ..
انا قلت مش هكتب, بس برضو حسيت إني عاوز أقول كلنتين .. وأيوه هما كلنتين
جيش على عسكر على بطيخ, الموضوع بتاعكم بقى رخم أوي, وأنا عارف إنه مش مستاهل يتكتب فيه أصلا بس أعمل إيه, هما الكلنتين !
هيا الناس مثلاً مش عارفه إن الجيش فاسد؟ شعب اهبل وبريالة إحنا؟ اول حاجة مبارك عملها لما مسك إنه أفسد الجيش, حتى لو كان الفساد ده مش بالشكل اللي يحطم الجيش, لكن فيه من أنواع الفساد اللي سمح لمبارك يكون قائده الأعلى لمدة 30 سنة, بالطول بالعرض !
مش عاوز أنتقد فيه كتير, لإن الناس عارفة كل حاجة, نيجي للكلام اللي عاوز يتقال بقى:
إحنا عملنا ثورة, ضحينا ودفعنا دم, وقفنا قدام الرصاص بصدر عريان, مخفناش من الموت, تفتكروا ليه؟ عشان نتخلص من مبارك ونجيب تلاميذه مثلاً ؟
كل مابشوف الفيديو ده او افتكره بحس قد إيه روح الإنسان ده عظيمة, وقد إيه روح الإنسان اللي قتله قذره, فياريت الناس تحدد هيا عاوزة تبقى انهي روح؟!
القضية مش شخصية أبداً ولا ولن تتوقف على أشخاص, القضية هي مصير أمة وبلد, وأكبر بكتير من أي حد. عشان كده مش عاوز اركز على أشخاص.
ناس بتقول عاوزة تشيل المجلس وتجيب مجلس رئاسي, مفيش مشكلة, عاوزة تعمل مجلس إنتقالي, برضو مفيش مشكلة, عاوزة تسيب المجلس نفسه برضه مفيش مشكلة, بس مهم جداً إن الشعب يعرف إن هوا اللي عاوز يشيل ويحط, وإن اللي مش هينفذ طلباته يمَشيه ويجيب غيره ينفذهاله, وهيا دي مصر اللي مات كتير عشانها, من حرب أكتوبر, للعبارة, للقطر, للتسمم والسرطانات والكبد الوبائي وكل أمراض الأرض اللي مش موجودة غير عندنا !
مهمة المجلس إنه يأسس لمصر المستقبل, مصر الجديدة, لكن واضح كده إنه بيعطلنا عنها, لغاية دالوقتي مش عارف يسيطر على الأمن, مفككش وزارة الفساد اللي اسمها داخلية, محاسبش الفاسدين, معملش حجات كتير أوي, الناس كلها حاسه إن الثورة منجحتش, تفتكر ده بسبب إيه؟
مش عاوز أقول نتصالح مع ماسبق, لكن أعتقد إن الجميع على إستعداد للتصالح إذا كان ذلك سيبني المستقبل, أما أن يحاول فاسد الماضي إفساد المستقبل أيضاً فهذا مالن يسمح به الشعب, وسيحاسبه على كل مامضى, وكل ما اقترفت يداه !
شباب مصر كتير منه عاطل, اللي عاوز يعمل داخلية من أول وجديد هيعمل ! كل الحككاية شهر ولا اتنين تدريب وهيبقى أحسن من وزير الداخلية الحالي نفسه ! بس تقول لمين, واضح إن عزيزي المجلس مش عاوز كده.
كل يوم نلاقي لعبة جديد من ألاعيب مبارك : طائفية, بلطجة, أزمات مفتعلة في الغاز والبنزين والسولار, تصريحات كاذبة: الإقتصاد ينهار, مخزون القمح, إلخ إلخ إلخ, وفي الآخر كله هلس .. حقيقي تلاميذ مبارك !
الشعب يريد إسقاط النظام, قالها الشعب صريحة وقوية .. النظام ها, والمجلس كل يوم بيثبت إنه هوا النظام !
فاستقيموا يرحمكم الله, لأن النظام كان العسكر, وأنتم العسكر, ويبدو أن هتافنا سيتحول ليكون : الشعب يريد إسقاط العسكر !
كلمة أخيرة: نفتكر في الآخر إننا هدقنا مصر .. مصر الأفضل, مصر اللي متستناش تلفون أمريكي, مصر اللي متستناش قمح من دول العالم بعد ماكانت بتأكل روما واشبه الجزيرة,
مصر .. وكفاية أوي اللي فات !
